Kamei le ai

Mi hei Gabrielle Bossis French mei pui le Jesu Christa lat kachu mei tuang pari ye. Book jan ruai na: He and I (Kamei le ai).

1936

August 22- Hi (Ship) lung khou. Mei ram mei gansek nun music concert nai na bam mei gan khou, ai Jesu khang king-gai kan mei khuan nun tei Kakhang mun reing kumna kat na bam tuang nge.
Kummei gan khou tei Kamei ruai jian na akhou sa ye: “Jianmei anah pui...”

August 23- Piano ru khou racha peng (altar) su the, kumna ai tho dui ruai (bird) khatni airplanes karak-karak khou aniu tuang hi (ship) ru khou sam pat mei ta kakhan bam tuang nge.

Jesu: “Tao hei tho Christa khang di the.”

Kumna hi tat bam pui gan khou: “Ram guai na hei nang khang de tu mei Nang ruai thai chui na bam tuang the; kumpui jang ruai ai ruai sa bam mak sini nu the.”

Jesu: “Kumbam sini nang sa ni na de, kalam tho Ai nang sa mei ta kahou we. Akhou sa katup wo. Mei gan khat ruai nang ta ai nang ta jian ne tu na samei gan khou peina nei la mei tinai ye.”

September 24 – Inthanmei-Brieux, Canada khou.

Rah kalum mei bam hei atuang room deng khou the, kumna ai ruai tat kan mei pum Kata jian mei ram nui nui lou we.

Jesu: “Mei guai na khang nui wo. Nang ruai mei ram mei ta jianna nui mei khou tei Ai ruai suihiam ti lou ni.”

October 24 – Montreal khou. (Jeng ri-ri na akhou sa ye).

Jesu: “Nang ruai na nang lung ning khou rim rim na gut du mak ge thai, nang Ata lagan lou we.”

October 25 – Christa Guang tuang ngai khou.

Asei lauthuan Mass khou hei Amu (Father) Boulier ruai ata Raguang khou aram lum tei Jesu pum khou kat lou the.

Jesu: “Aram Jian tei chik sin ngo. Ata ti hei inrhuna nah (orphang)/kapui-kapu mak mei nah khang suang sini gan lou na bam me.”

November 3 – France tang khang tat bam mei Hi khou mass nai bam khou.

Jesu: “Ajei khou ngam pri-rimei su inthan ngam mei ngam (power) nai ye tumei lum mo.”

December 14 – “Mei guai na khang aram nui akhatni atuang jianmei khuan su khang karam mo...”

December 17 – “Tingkau hei tao ruai kahou di kho. Kagan kagan khou Ai ruai nang ta jian bam khou hei nang ni ata jian no.”

Nei khat tingjin

Jesu: “Nang ruai na inthui thik-thik mei ram gai akhatni inthui thik-thik mei ma-ngui hou pui sik, nang ata phu tou we.”

December 19 – Jesu: “Ai ruai na nang khou lat kachu tuang nge tumei nang karak karak lumsi ye. Hei tei thuiduak mak ge, nang ran na ta jian ngo. Anei hei pum khat na ram na cho?

December 21 – Jesu khou akhang suihiam ai nei ye, kumna gansak ruai na Kajaojian lamak na gan lou mei guai tini akhang tuna nei bam pui gan khou Kamei ruai sa ye:

Jesu: “Atuang suihiam hei biu khang ti ye, kume cho tiki Ai nang khang buna ti hian ngam de. Ai ram guai na ngam mei Pu ram mak na cho? Nang ruai na nang kai khun mei nun hu khou echam-cham mei kum na, Akhou ni echam-cham mo.

December 24 – “Nang ran na ta tho chareak thai yo, tiki mei ram mei ta tho jian thai yo khatni kuaklou thai yo.”

Inthanmei St. Augustine

 Inthanmei Augustine

Kapanti khou kandhi ram neila akhatni bhanpum-jeipum ruai kahou mei guai tei tipian na lung bam khuan ne. Kumme tiki kalung khou Inchum mei tei tabui cho tu mei thai ni mei chun tei nai khun ne. Kandhi ruai na kakhang neilamei akhatni peinmei tei ti lou ngam mak ge  tu mei tei kamei ruai thai khuan ne. Kumpui jang ruai, kamei tingkum 31 khou kapanti kalai na inchum mei panti khou lung dat khuan ne.  

Kamei kapanti kalai dat mei gan khou katuang larik Confession khou kumna hi lou khuan nge.  

"Araguang nang ta ai jian nian the, kumna jaolo,
Nang alung khou bamme kume cho tiki I tho kapeng khou bam khuan ne, kumna I nang ta kapeng khou phu na bam khuan nge.
Nang ata kao we, khatni kapna khuanranna anukuan di mei tasini tichu we.
Nang riu akhatni nang ram ghan ruai amik tiatmei ti lagan luowe.
Nang ruai ata kahi lou we, kumna  nang tuang inchu-injang mei tei ai alung khou mai kumna chuang na kahou we.
Nang khang na ruai na aniu ta kasiem lou tuang nge.
Kumna aniu lungning hei nang khou bam kei lou mak san pei na katuak ge.
Araguang nang ta ai jian nian the, Nang ram gai hei reidou khou na ruai na asei phou kathan suna bam tan-tan ne."  

Inthamei Augustine anui khang kalum inkhan lou wo.

Inthanmei Scotland mei pui Margaret

Inthanmei Scotland mei pui Margaret

Inthanmei Margaret hei tinkum 1045, Hungary tu mei bam khou puan lou khuan nge. Kapu jan ruai na Edward Atheling tu na kau we. Kapu hei England mei Guang bam lin nimei the. Kapui jan ruai na Agatha tu na kao we. Agatha hei Hungary mei tuang Guang nah ye. Kumna Margaret hei English mei tuang guang nah khuan nge. Norman mei nun ruai England mei ta rih ngam khuan the tingkum 1066 khou. Kum ti pui jang ruai kakai kaikhun Scotland khou tei tat khuan the. Tingkum 1070 khou tei Margaret hei tinkum 25 tang khuan the. Kamei hei Malcom Canmore, Scotland mei tuang guang nou su khuan the. Margaret hei pei na rah lum mei pui khuan nge. Kamei ruai ni lungsi rianra mei nun ta kha lou pui tan peina tan lou khuan nge. Kanah katummei Scotland mei tuang Guang su khuan ne, kumna kanah tunapui ni England mei tuang Guang nou su khuan nge.  

Margaret kaghan ti hei peina tikalai lou khuan nge. Kamei ruai kaghan khang Bible ni pa lou khuan nge. Kumna kamei hei Church kalummei tuang tan duan kaguai na khou tei pei na lunggut na tan lou we. Kaghan akhatni kanha nun guai- kadai suna kanah ganlou liangmei David I- hei Guang  gai mei akhatni inthan mei nun chapat ngam khuan ne. Margaret hei pei na inthanne, kumna kakheiliak ni pei na gai khuan ne, kumti pui jang ruai kaghan tani kamei ruai tikalia lou the, kumna Scotland guandi ta ni gaimei cheng khou tei jai lou khuan nge.  

Kamei hei lungsi mei nun akhatni puipu mak mei nha nun khang nap ti tulou khuan nge. Kumna lungsi mei phai ni khu we, Jesu Christa tan mei lou mei ti kum ma. Jipmang khou ni rah kalum khang thao thao khuan nge. Kamei rah kalum khang kagan gei na tipat re, inthan mei larik nun ni gei na pakhuan ne, kumna church tuang phei nun ni lung gut na hui lou we.  

Kaghan Malcolm le kanha ganthao mei, Edward hei Alnwick rhi khou ruai thei the. Mi pau tei chu lou khou ruai ni kapum suanmei tei ni hian kulana kamei ni jang nei thum pui nei tang thai the. Kumna kata Dunfermline Anney tumei bam khou phum lou ka the. Kamei ti hei Pope Innocent IV ruai tingkum 1250 khou tei inthanmei the tuna daolou the. Kamei hei Scotland mei tuang jao sinlou bamei inthan mei the.  

Asei hei Kamei tati hei aniu tuang Church ruai Pui nun guai khang kadai su na Inthanmei lulung tei lung ngam khang tu na dao lou tuang the.  

Inthanmei Margaret, aniu guai kaikhun khang kalum lou wo!