Kamei le ai

Mi hei Gabrielle Bossis French mei pui le Jesu Christa lat kachu mei tuang pari ye. Book jan ruai na: He and I (Kamei le ai).

1936

August 22- Hi (Ship) lung khou. Mei ram mei gansek nun music concert nai na bam mei gan khou, ai Jesu khang king-gai kan mei khuan nun tei Kakhang mun reing kumna kat na bam tuang nge.
Kummei gan khou tei Kamei ruai jian na akhou sa ye: “Jianmei anah pui...”

August 23- Piano ru khou racha peng (altar) su the, kumna ai tho dui ruai (bird) khatni airplanes karak-karak khou aniu tuang hi (ship) ru khou sam pat mei ta kakhan bam tuang nge.

Jesu: “Tao hei tho Christa khang di the.”

Kumna hi tat bam pui gan khou: “Ram guai na hei nang khang de tu mei Nang ruai thai chui na bam tuang the; kumpui jang ruai ai ruai sa bam mak sini nu the.”

Jesu: “Kumbam sini nang sa ni na de, kalam tho Ai nang sa mei ta kahou we. Akhou sa katup wo. Mei gan khat ruai nang ta ai nang ta jian ne tu na samei gan khou peina nei la mei tinai ye.”

September 24 – Inthanmei-Brieux, Canada khou.

Rah kalum mei bam hei atuang room deng khou the, kumna ai ruai tat kan mei pum Kata jian mei ram nui nui lou we.

Jesu: “Mei guai na khang nui wo. Nang ruai mei ram mei ta jianna nui mei khou tei Ai ruai suihiam ti lou ni.”

October 24 – Montreal khou. (Jeng ri-ri na akhou sa ye).

Jesu: “Nang ruai na nang lung ning khou rim rim na gut du mak ge thai, nang Ata lagan lou we.”

October 25 – Christa Guang tuang ngai khou.

Asei lauthuan Mass khou hei Amu (Father) Boulier ruai ata Raguang khou aram lum tei Jesu pum khou kat lou the.

Jesu: “Aram Jian tei chik sin ngo. Ata ti hei inrhuna nah (orphang)/kapui-kapu mak mei nah khang suang sini gan lou na bam me.”

November 3 – France tang khang tat bam mei Hi khou mass nai bam khou.

Jesu: “Ajei khou ngam pri-rimei su inthan ngam mei ngam (power) nai ye tumei lum mo.”

December 14 – “Mei guai na khang aram nui akhatni atuang jianmei khuan su khang karam mo...”

December 17 – “Tingkau hei tao ruai kahou di kho. Kagan kagan khou Ai ruai nang ta jian bam khou hei nang ni ata jian no.”

Nei khat tingjin

Jesu: “Nang ruai na inthui thik-thik mei ram gai akhatni inthui thik-thik mei ma-ngui hou pui sik, nang ata phu tou we.”

December 19 – Jesu: “Ai ruai na nang khou lat kachu tuang nge tumei nang karak karak lumsi ye. Hei tei thuiduak mak ge, nang ran na ta jian ngo. Anei hei pum khat na ram na cho?

December 21 – Jesu khou akhang suihiam ai nei ye, kumna gansak ruai na Kajaojian lamak na gan lou mei guai tini akhang tuna nei bam pui gan khou Kamei ruai sa ye:

Jesu: “Atuang suihiam hei biu khang ti ye, kume cho tiki Ai nang khang buna ti hian ngam de. Ai ram guai na ngam mei Pu ram mak na cho? Nang ruai na nang kai khun mei nun hu khou echam-cham mei kum na, Akhou ni echam-cham mo.

December 24 – “Nang ran na ta tho chareak thai yo, tiki mei ram mei ta tho jian thai yo khatni kuaklou thai yo.”

Abumeng ruai tari mei

Abumeng tari mei

Mansei lungning hei ka-ngan makmei akhatni takmak mei ram jian ta kahou we.

Mansei lungning hei injianna bamkariu mei ta ni kahou we.

Mansei lunging hei tingmik tingmik khou gaikhit gaikhit ku mei tani kakhou we.

Kajiabmei: Gaimei lauthuan Jesu!
Jesu: Gaimei lauthuan Jianmei!

Kajiabmei: Kaipou, ai ruai thai ye tumei tho: “Apanti akhatni apum kaguai na ruai na kahou mei tho JIANMEI TANA DE.”

Jesu: Nang ta dam lou mei kaipou tho JIANMEI DE, kalam tho RAGUANG hei JIANMEI YE (1 John 4:8). Ai nang khou lat akhat than ne: “Nang lung pean mei hei, mansei nun akhatni kandi tuang puat khou ruai la tou ngam pan dai?”

Kajianmei: Apanti khou ruai thai ye tumei tho, asei phau mei lung khou hei, alung-ning hei pean mei ta thai mak ge. Mansei ram jian akhatni kandi ram gai tani thai lou the. Nang ban siem pei na gai ye, kumme tiki alungning hei bam kei lou mei bam thai mak ge.

Tingseng the, ai mansei khou akhatni kandi puat khou phuna tat bam mei hei, kumme tiki asei phau mei lung khou hei pean mei ta ai thai mak chang nge.
Jesu: Jianmei, nang ta-ti hei JIANMEI ruai dam lou tuang nge. Kumna KAMEI na ruai nang khou pean mei ti lou ngam ni.

Kajiabmei: Acheibung Jesu, asei ruai thao na apanti khou Raguang ta jian hean na lung ni the.
Jesu: Raguang ruai nang ta kachang na injian na bam me.

“Nang hei amik-jao khou peina kung nge, champou we, kumna Ai nang ta jian ne.” (Isaiah 43:4).
“Ai nang ta ka-nganmak mei ram jian- jian lou the, kumpui jeng ruai Ai nang deng khou bam tan tan na bam me.”(Jeremiah 31:3).

Kajiabmei: KAIPOU JESU, asei nang ruai na akhang RAGUANG ram jian tithai lou  dat mei khang ta dai na thuan ku the. Asei hei ai DAILIANG MEI RAGUANG LATDAN ta ning tou we: “Nang kaipou Ranguang ta nang lung, nang bumeng akhatni nang pumtan kapum ma ruai injian no. Kumna nang kaigei mei tani nangran na ta jianmei kum na injian no.” (Matthew 22:37-39).
Mi latdan hei ai ruai na pui chui na lung ye thai nei la mei hei maphung pha na lung puni the tumei ai lum me.

Jesu: Gai the Jianmei. Ai nang le bam cham tan tan na bam de. (Matthew 28:20).

Inthanmei St. Augustine

 Inthanmei Augustine

Kapanti khou kandhi ram neila akhatni bhanpum-jeipum ruai kahou mei guai tei tipian na lung bam khuan ne. Kumme tiki kalung khou Inchum mei tei tabui cho tu mei thai ni mei chun tei nai khun ne. Kandhi ruai na kakhang neilamei akhatni peinmei tei ti lou ngam mak ge  tu mei tei kamei ruai thai khuan ne. Kumpui jang ruai, kamei tingkum 31 khou kapanti kalai na inchum mei panti khou lung dat khuan ne.  

Kamei kapanti kalai dat mei gan khou katuang larik Confession khou kumna hi lou khuan nge.  

"Araguang nang ta ai jian nian the, kumna jaolo,
Nang alung khou bamme kume cho tiki I tho kapeng khou bam khuan ne, kumna I nang ta kapeng khou phu na bam khuan nge.
Nang ata kao we, khatni kapna khuanranna anukuan di mei tasini tichu we.
Nang riu akhatni nang ram ghan ruai amik tiatmei ti lagan luowe.
Nang ruai ata kahi lou we, kumna  nang tuang inchu-injang mei tei ai alung khou mai kumna chuang na kahou we.
Nang khang na ruai na aniu ta kasiem lou tuang nge.
Kumna aniu lungning hei nang khou bam kei lou mak san pei na katuak ge.
Araguang nang ta ai jian nian the, Nang ram gai hei reidou khou na ruai na asei phou kathan suna bam tan-tan ne."  

Inthamei Augustine anui khang kalum inkhan lou wo.

Raguang ram jian

Meipui akhat ruaina kanah tina nou bam mei ta kamei mhu ngam pan dai, ramme thai kamei ruai puan lou mei nah ta jian lou mak ngam pan dai cho?  

Meipui nun ruai kanah nun ta mhu bam pusini, I ruai tho nang ta mhu lak ge. Jaolo, nang jan hei aban pah khou hi lou bam the.  (Isaiah: 49.15-16)  

Jianmei ruai padik mei pu aniu mansei nun ta tak mak na phu na bam me. Joajian kaikham ni kagan kathui na han lou bam me.  

Raguang  hei ata jaosin lou mak ghe tu mei hei lan ne.
Raguang khang suang mansei ram jian ruai dai hian ne tu mei hei lan ne. Raguang hei kalungpuam si ye tu mei hei lan mei ye.
Raguang hei meigai mei akhatni inchum mei nun tana jian ne tu mei ni lan ne.  

Tiki inchum mei tho Raguang hei Jianmei ye. Kumna kamei nang le ata tak mak na jian na bam me. Nang le ai ruai kungtina akhatni gai tina jian tuang ram mak ge, Kamei ruai jian lou ti na nang le ai kung tuang nge akhatni gai tuang nge.   Raguang hei pui khang suang sini jian na bam me, kumna kamei nang le ata ning tou na bam me. Nang jan le ajan kaban pha khou hilou the...

Kajaojian bang khou aniu bam me...